{"id":4393,"date":"2007-05-19T19:26:47","date_gmt":"2007-05-19T19:26:47","guid":{"rendered":"https:\/\/ibrahimsheme.com\/?p=4393"},"modified":"2007-05-19T19:26:47","modified_gmt":"2007-05-19T19:26:47","slug":"bikin-kona-littattafai-amsar-abdalla","status":"publish","type":"post","link":"https:\/\/ibrahimsheme.net\/?p=4393","title":{"rendered":"Bikin kona littattafai – Amsar Abdalla"},"content":{"rendered":"
Professor Abdalla Uba Adamu<\/p>\n
Sashen Horon Malaman Kimiyya da Fasaha<\/p>\n
Jami\u2019ar Bayero, Kano<\/p>\n
Hira da Maje el-Hajeej na Hausa Leadership wacce za ta fito a wannan satin (19 Mayu 2007).<\/p>\n
1. Shin a matsayin ka na Furofesa ko bikin kona littafan Hausa da gwamnati ta yi ya dace?<\/strong> \n \n<\/strong>Ba a matsayina na furofesa zan yi magana ba \u2013 domin za ka samu furofesoshi da dama wadanda wanna abin ya zauna mu su daidai. Zan yi magana ne a matsayina na almajiri mai neman ilimi. Gaskiya a nawa ra\u2019ayin wannan bai dace ba, domin babu cikakken bayani game da laifin da littattafan da a ka kona a ka ce sun yi. Da zai yi kyau, kafin a kona, a yi wani sharhi a kan kowanne littafi domin nuni ga ire-iren abubuwan da hukuma ta haramta kuma wadanda suka fito a cikin wadannan littattafan. Ta haka za a tabbatar da cewa sun aikata wani laifi. Yin haka shi ne adalci.<\/p>\n
Amma ko da sun aikata laifi, konawar ba shi ne mafita ba \u2013 domin konawar zai jawowa gwamnati wata matsala inda za a funskance ta a kan maras son ci gaban al\u2019uma. Sannan kuma za a iya kwatanta wanna da ire-iren abubuwan da gwamnatin Taliban ta yi a Maris 2001 na dandake gumakan Buddha, wadanda sun fi shekaru dubu a kasar, har ma duniya ta dauke su a matsayin jarin al\u2019adun al\u2019ummatn duniya. Manazarta sun yi kuka da lamarin da nuni da cewa duk da wadannan gumakan na kafirci ne, wanda kuma ya sabawa gwamnatin Taliban ta wancan lokacin, amma adanasu na da humimmanci wajen tattara tarihin dan Adam da nuni da yadda rayuwarsa ta gabata, wannan ma kadai zai hana a sake yunkurin bauta musu domin da ganinsu ka ga sakakkun abubuwa wadanda ba su cancanti a bauta musu ba.<\/p>\n
Amma duk da cewa ban goyi bayan konawar littattafan kagaggun da aka yi ba, dole mu yi la\u2019akari da cewa gwamnati na da hakkin kula da rayuwar jama\u2019a ta yadda ya dace da jama\u2019ar. Saboda haka in bera na da sata, daddawa na da wari.<\/p>\n
2. A matsayin ka manazarci ko irin wannan bikin kona littattafai ya na faruwa a wasu sassan duniya?<\/strong><\/p>\n
Bikin kona littattafai ba abu ne sabo a duniya ba. Tarihi ya nuna cewa hukumomi da dama a lokuta dabam-dabam sun shugabanci bikin kona littattafai saboda dalilai guda uku. Na farko tunanin cewa abin da aka rubuta ya sabawa akidar al\u2019ummar da aka rubuta a cikinta. Na biyu sabawa addinin da hukuma ta yarda da shi \u2013 ko da marubucin ba ya cikin addinin hukumar. Na uku siyasa tana sa hukuma ta jagoranci kona littattafai domin ganin an karya alkadarin \u2018yan adawa da gwamnatin da ke kan gado.<\/p>\n
Abin da ya sa ake kare fasihai (marubuta, mawaka, da kuma masu zane ko fim) daga bikin kona ayyukan fasaha shi ne wata rana ba rubutun za a kona ba \u2013 fasihan za a kona. An taba yin haka a China a karkashin masarautar Qin (shekaru 212 kafin bayyanar Annabi Isa (AS) wacce Qin Shi Huang ke shugabanta, inda shugaban lokacin ya ga kona littattafan bai isa ba, sai ya hada da kona masu rubutun littattafan; har ma da masu karatun \u2013 duk sai da ya sa a ka kona su, kimanin mutane 450.<\/p>\n
Haka ma sojojin Rumawa suka bi wannan salon kona littattafan da ke Laburaren Alexandari a jihar Alexandria da ke Masar (Egypt) shekaru 300 kafin bayyanar Annabi Isa (AS). A wannan lokacin a duk fadin duniya babu wata laburaren da ta fi wannan girma, yawan littattafai da kuma manazarta. Kar fa a manta duk tarin littattaan da hannu aka rubuta su, domin lokacin babu injin buga littafi.<\/p>\n
Da Hitilar ya zama shugaban Jamus kuma ya kafa akidar Nazism, shi ma ya shugabanci kona littattan da Yahudawa suka rubuta, a rukunayen shekarun 1930 da 1940. Misali, ranar 10 ga Mayu 1933 kusan littattafai 20,000 a ka saka daliban suka kona a Berlin.<\/p>\n
Babu inda ba a kona littattafai ba \u2013 daga kasar Amurka, inda ake ganin sun fi kowa walawa, zuwa kasashen da dama ana ganin kamar a takure su ke. A Ingila a shekar 1525 an kona littafin Injila wanda William Tyndale ya rubuta. Sannan a 1633 an kona Histiro-Mastix, littafin Willian Prynne wanda ya kalubalanci sarauniyar Ingila. Shi kansa marubucin, an kama shi, a ka yi masa dukan tsiya, aka yanke kunnuwansa, sannan a ka kulle shi a gidan yari. A Amurka a 1650 an kona littafin Willianm Pynchon, mai suna The Meritorious Price of Our Redemption saboda ana ganin ya yi sabo. Jaridar farko a Amurka, Public Occurences, haramta fitowarta a ka yi a 1650.<\/p>\n
Kada kuma a dauka wai jahiliyyar ilimi ce ta kawo wannan. A dai Amurka din, a jihar New Mexico, a 2001 an kona kagaggun labaran Harry Potter, labarin wani yaro mai yin shihiri.<\/p>\n